Ua tali le matagaluega o le va i fafo a Niu Sila i lapataiga mai Korea i Matu e tusa ma le mata’ituina o lona atunuu.
O lea ua sau le valaau mai Korea i Matu i atunuu e iai Niu Sila, Peretania, Kanata, Siamani, Farani ma Ausetalia ia tuu nei loa le lalafi atu i tua o sā a Malo Aufaatasi poo le United Nations a o taumafai atu ai e faalavelave i ana faiga faamiliteli.
O se valaau ua fai mai ai foi o le a oo i le isi tulaga Korea i Matu e puipuia ai ona tagata pe afai ae oo atu i se tulaga e moomia ai.
Peitai e ui i nei lapataiga e lē o suia ai le mafaufau o Niu Sila ma lana tu malosi lea o loo teena ai polokalame faaniukilia a Korea i Matu.
Fai mai le sooupu a le matagaluega o le va i fafo a Niu Sila i tala a le Newshub, o polokalame nei e lē ogatasi ma taiala a Malo Aufaatasi.
O le ta’u atu ai ma Niu Sila i le vaaiga o Korea i Matu ua sau ai ona o lea na faaaogā se tasi o vaa a le militeli a Niu Sila mai le ogatotonu o le masina o Aperila seia oo mai i le masina lenei e mata’itu ai faiga faasolitulafono a le militeli a Korea i Matu lea e aofia ai ma fela’ua’iga faafesuia’i i le va o vaa feoai i le sami, peitai o ni faiga e lē o faatagaina e Malo Aufaatasi.
Puna o Faamatalaga: New Zealand’s Ministry of Foreign Affairs responds to chilling North Korea threat | Newshub
