Ua faatoese le alii pule o le Sims Pacific Metal i Favona i Aukilani i le aafia o pisinisi faapea feoaiga e mafua mai i le mu ma ua polomisi o le a faia iai suesuega.
O le mu lenei na amata alia’e i le tea laititi o le itula e 12 i le po o le Aso Lua o le vaiaso lenei, peitai e oo mai lava i le po o le Aso Lulu o loo iai pea sui o le tineimu ona e lei iloga lava ona iai i se tulaga ua mautinoa ua tineia le afi, ma o lea na matuai poloka ai ma feoaiga ma lei taunuu malaga a trains i Aukilani i le Aso Lulu i le taimi pisi o le taeao.
E ese mai i pisinisi ma taavale feoai, o lea foi na tapunia ai ma nisi o kolisi maualuluga i Otahuhu faapea Papatoetoe.
Saunoaga a le alii pule ia David Burrows e le o mafai ona iloa tonu le mafuaaga o le mu ma o loo faasolo pea nei suesuega.
Ae mai le ofisa o le tineimu i le po o le Aso Lulu, o aiga Otahuhu lea e oo mai lava i le po o le Aso Lulu o mafatia i le malosi o le manogi o le asu e ui ua amata ifo le malosi o le asu.
O loo fautuaina soo se tasi e aafia i le asu e mafua mai i le mu lenei ona o le maualuga o le tulaga lamatia mai tino o taavale faapea le tele o uamea mu e aafia gofie ai le soifua maloloina, e vave faafesootai le Healthline.
O le mu i le vaiaso nei, o le faatolu ai lea i totonu o le fitu tausaga ua lipotia mai ai se mu i le pisinisi lava lenei e tasi, o le isi i le 2017 ma le tasi 2018.
