Ua una’i ese e sui faipule o le Leipa ni faafesili sa tuuina atu ia i latou e faatatau i le ta’ita’iga a le Palemia o loo iai nei Jacinda Ardern, i se taimi ua alia’e ai pea le faaitiitia o le lagolago mo le pati ma le Palemia e pei ona ta’ua i lipoti a le Newshub.
O palota faata’ita’i i le amataga o le vaiaso nei ua faailoa ai le faaitiitia o le lagolago a tagata mo le Leipa faapea foi ma le National ae faailoa ai foi e ui i lea tulaga ae o le a mafai lava ona faatū se faigamalo a le National ma le ACT.
O tulaga i palota mo ta’ita’i o vaega faaupufai ua faailoa ai foi le pa’ū o le lagolago mo le Palemia faapea foi le ta’ita’i o le National ae o le ACT party leader o David Seymour ua siitia le lagolago i le 5 pasene. Fai mai faipule o le Leipa e lē o iai se fuafuaga e aveesea lo latou ta’ita’i mai lona nofoa.
