E lē o faamaonia e iai ni faila leiloloa mai le mataupu i suesuega o le maliu o Tuau Maletino i le 2021.

O le tali a le Komesina o leoleo na tuuina mai ina ua fesiligia e le media o loo iai tala salatua na leiloloa mai ni faamatalaga poo statements mai le faila o suesuega o le mataupu i le maliu o le talavou lea.

Faaalia e Auapaau Logoitino Filipo e lē moni ia tala, sa fesiligia foi i le aofai o molimau o le mataupu lenei ma ia faailoa mai ai e lē o maua le numera ae toatele molimau sa faatalanoa e leoleo.

Ua faamanino mai ai foi e Auapaau o loo sailiili lava leoleo i lea mataupu ona o loo tuuina atu lava faamatalaga e tagata o le atunuu.

O loo manino le saunoaga a le Minisita o Leoleo i le Palemene e faatatau i lenei mataupu e faapea e lē mafai ona tuuina atu i le Faamasinoga ona e leai se mau malosi ma mautu e aveina ai lea mataupu i le faamasinoga ma ua iai foi lana faaiuga na te lagolagoina le suesuega ma le faaiuga a le Matagaluega o Leoleo.