Ua faamaonia mai e le Fofoga Fetalai Papaliii Li’o Taeu Masepa’u o le a lē faatautoina sui faipule tamaitai faaopoopo e toalua  lea na filifilia mai ina ua maea palota laiti i le vaiaso fou. 

I le ripoti a le Samoa Observer na taua ai e Papalii o le faatautoina o ia sui faipule e toalua o le a tolopoina seia faia se gaioiga faaletulafono i le faaaogaina o le vaega 44 (1a) mai le Ofisa o faigapalota e le faamasinoga maualuga. 

Taua e Papalii “O loo iai le iuga a le faamasinoga o talosaga apili o loo manino mai le filifilia o sui faaopoopo o tamaitai i le Palemene pe a maea uma palota laiti ma ni tagi o faigapalota laiti.” 

“There is a Court of Appeal decision that makes it clear the awarding of the additional seats is activated once all by-elections and petitions are settled,” 

Faailoa foi e Papalii o loo iai ni tagi o le faigaplota laiti lea na faatoā maea atu i le masina na te’a nei o lona uiga e le’i faamautūina lelei iuga o faigapalota laiti ma ua vavevae tele le filifilia o sui faaopoopo o tamaitai mo le Palemene. 

Faamaonia foi e le afioga i le Fofoga Fetalai e na’o sui faipule e to’aono na manumalo mai i faigapalota laiti ma le sui o le itumalo Falealupo lea e le’i palotaina le nofoa o le a faatautō i le Aso Lua o le vaiaso fou. 

O sui tamaitai e toalua lea na filiiflia mai i le maea ai o palota laiti i le Aso 26 o Novema lea o le a lē faatautoina i le vaiaso fou e aofia ai le afioga Aliimalemanu Alofa Tuuau o le sui mai Alataua Sisifo ma le susuga Faagasealii Sapoa Feagiai o Aleipata Itupa i Lalo o sui uma mai le vaega faaupufai e Puipuia Aiā Tatau o Tagata le HRPP.