O le taugata o tau o ni mea e manaomia mo o le faatinoina o se fuafuaga e ono avea ma pa pupuni o le fia auai o se tasi i se fuafuaga.
E foliga e tali tutusa lava ma nai alo ma fanau e fia taaalo i ni taaloga ae ua fai se maualuga o le tau o meataalo e manaomia ina ia auai ai.
O se lipoti i le Newshub i le asō ua faailoa ai ua iai se fofo o lea ituaiga faafitauli ua taulai iai le vaai a se alii talavou mai Aukilani ma ana uo, ua manatu o le a fesoasoani lea e faaitiitia faafitauli tau tupe o loo avea ma pa pupuni i le mafai ona auai o tagata talavou i taaloga e fiafia iai.
O le fuafuaga ua faaigoa Boot it, na amata i se manatu o le alii talavou 14 tausaga o Corbin Martin ma ana uo e toe faalelei seevae taalo mo nai aiga e lē o mafai ona ausia e nai fanau mea e manaomia e auai ai i taaloga.
Ua silia ma le 130 pea seevae ua tuuina e le polokalame lea mo nai tamaiti ma ua o latou faamatala foliga fiafia o nai fanau ua mauaina ia fesoasoani.
O se taumafaiga ua ave iai le faamalo a le Sport NZ.
