I le to’alima o minisita o le kapeneta sa avea ma sui o le komiti faatonu o le poloketi tasi le miliona tala ina ua amata faagasolo lea polokalame o le atina’e o nuu ma itumalo, ua toe to’alua nei minisita ua avea ma sui o le komiti faatonu le steering committee.
Ua na o le Minisita o le Matagaluega o Tina ma Tamaitai Atina’e o Afioaga ma Agafesoota’i o le ta’ita’ifono, ma le Minisita o Tupe.
O isi sui o le komiti o le Ofisa Sili o le pulega o lea matagaluega ma ofisa sinia o le pulega faapea i latou o loo gafa ma lea poloketi tāua a le Malo.
O se avanoa na feiloa’i ai ma le minisita ua tauaveina nei le vaaia o le poloketi ma le matagaluega o tina ma tamaitai atina’e o afio’aga ma agafesoota’i, le tofa Lagaaia Tiaituau Tufuga na ia faamaonia mai ai lea suiga.
Na faaalia e le Minisita o se suiga e talu ona amata faatino ua vave faagasolo le faamatuuina atu o vaega tupe o le poloketi i komiti a Fono Faavae.
Ua iai le talitonuga o le tofa Lagaaia e oo atu ia Me ua amata faamatuu vaegatupe mulimuli o le miliona tala lona tolu ae faamoemoe o Novema o le tausaga nei ua tatau ona faamatuu vaegatupe o le miliona lona fā, ma taualuga ai i le miliona mulimuli e maua ai e itumalo faapalota e 51 le ta’i lima miliona sa folafola e le faigamalo a le Faatuatua i le Atua Samoa ua tasi.
O le mafua’aga sa tuai ai ona faagasolo le poloketi e pei ona faailoa e le minisita ona sa lua komiti, e ese le komiti o galuega ese le komiti faatonu.
O le suiga ua iai ua tasi lava le komiti e gafa ma le iloiloina o vaega uma o le poloketi, o latou foi ia e faia asiasiga e saili ai poo lelei poo iai ni faaletonu o le faatinoga e fono faavae a itumalo o a latou fuafuaga o le atinae o loo faaalu iai vaegatupe.
