Ua faailoa e le Ofisa Sili o le pulega o le Lakapi Samoa i se lipoti a le vaega faasalalau o le Talamua, le faamaonia o le aveesea o se tasi sa avea ma video analyst o le aulakapi a tamaitai o le Manusina, e mafua ona o se tuuaiga i sana amio ua lē migao, poo le inappropriate behavior.
O le video analyst o le tagata e gafa ma le mataituina o le ata pue poo le video o le taaloga, o ia foi na te silafia vaega o loo iai ni faaletonu o le taaloga ona faailoa lea i le faiaoga ma le pulega ina ia faia iai se galuega mo le faaleleia.
Faaalia e le Ofisa Sili le susuga Faleomavaega Vincent Fepuleai i lea lipoti o se faaseā na tuuina atu e le pulega o le Manusina a o iai le Manusina i Aferika i Saute i se malaga taamilo ia Oketopa o le tausaga na tea nei.
O le suesuega na faia e le pulega o le Lakapi Samoa e tusa o lea faaseā, na faia ai ma le faaiuga e aveese loa le tagata sa feagai ma lea matata i totonu o le ‘au a tamaitai.
O le suesuega foi lea ua faamuta ai ma le toe auai o lea tagata o se tama tane, i soo se taaloga a le Manusina.
