O le manumalo o le ali’i fusu o le atunuu i Ausetalia o Jai Opetaia ma faatumau ai pea lona umia o le fusi o le IBF i le paga o le cruiserweight, ua ‘ave ai le fa’amanuia ma le faamalo a le afioga i le Palemia o Samoa i lea alo ma tama fanau a le atunuu.
I upega tafāilagi a le malo o Samoa o loo fa’ailoa ai e le Palemia, susuga Laaulialemalietoa Leuatea Poalataiavao Fosi lona agaga faafetai i le taunuu manuia o lea fusuaga i le faaiuga o le vaiaso, “Faafetai i lou finau mo mea lelei auā le tapuaiga a lou atunuu, faafetai i lou loto nuu i le avea o oe ma lupe faalele a Samoa i le fa’āgātama faapolofesa o faipelega”, o nisi o faaupuga o le feau faamanuia mai le Palemia mo Jai Opetaia.
O le tua’ā tamā o le ali’i Palemia o se tamāli’i ta’uta’ua i le taaloga o le fusu, o le siamupini foi o le paga mamafa i tausaga sa ta’alo ai i lona talavou, le afioga Polataivao Fosi Schmidt, sa tautua foi i le tofi faipule o le itumalo o Gagaifomauga 3 i le Palemene.
