Ao faagasolo ai pea feiloaiga a Minisita fou. o Minisita lagolago ma a latou Matagaluega filifilia na faaleo ai e afioga i Minisita fou le fa’amālō ma le faafetai i le aufaigaluega mo a latou tiute fai e tautua ai Samoa.
Na faatumulia le maota o le TATTE Building i le taeao nei i le mataglauega o Faatoaga ma Faigafaiva e faafeiloai ai i le latou Minisita le afioga ia Laaulialemalietoa Leuatea Polataivao Schmidt ma le Minisita lagolago le afioga ia Vaele Paiaaua Iona Paiaaua Sekuini mulimuli ane feiloai ma le isi vaega o le la Matagaluega le SROS.
I ia feiloaigaa na ave ai le faamalo a Laauli i le aufaigaluega i le latou galuega fitā e ala le ai le tautuaina o le atunuu aua o vae ma lima ia o le faatinoga o le tele o galuega mo le malo.
O le asō foi na feiloai atu ai le Sui Palemia o le Minisita foi lea o Matagaluega o Lafoga le afioga ia Tuala Tevaga Iosefo Ponifasio ma lana Minisita lagolago le afioga ia Masinalupe Makesi Masinalupe. Na molimauina le faatumulia o le ofisa o Lafoga i Apia i le sauniga faapitoa e faafeiloai ai i Minisita fou o lea Matagaluega.
O le vaiaso atoa lenei na faagasolo ai le tele o feiloaiga a Minisita ma o latou Matagaluega ma o le faamalosiau masani a Minisita taitasi ina ia tumau le galulue soosootauau o taitai ma le aufaigaluega aua se siosiomaga lelei ma le saogalemu mo tagata uma ae faasilisili ai le tuuina atu o se auaunaga aupito sili ona lelei mo tagatanuu o Samoa.
