Ua amata galuega o lenei tausaga fou i le faatinoina o se tasi o fuafuaga a le Malo mo le poloketi tasi le miliona tala, e pei ona sainia ai se faigapaaga a le Matagaluega o Tina ma Tamaitai Atinae o Afioaga ma Aga Fesootai o loo vaaia le poloketi o le atiina’e o itumalo faapalota e 51, ma le faalapotopotoga o le SUNGO o le itutino o loo avea ma faamalu o faalapotopotoga tuma’oti uma i Samoa.
O lea faigapaaga e ala i se maliega ua ta’ua o le memorandum of understanding poo se MOU, ua ave ai le galuega o le a’oa’oina o tagata faigaluega o ofisa o Fono Faavae e 51 i le SUNGO.
O le a latou faia a’oa’oga e faatatau i le tāua o pulega lelei e ala i le vaaia o meatotino a le Malo ma le faatinoga o galuega ua aiaia i le taiala o le poloketi tasi le miliona tala.
O le feiloaiga a tusitala ma le tamaitai Minisita o lea matagaluega a le Malo o loo iai le vaaia o le poloketi tasi le miliona, na faailoa ai e le Minisita le afioga Mulipola Anarosa Ale Molioo le tāua o le a’oa’oina lelei o i latou ua ave iai le faatuatuaga o le faatinoina o le poloketi.
E 200 afe 180 tala le tau o le a faia ai e le SUNGO ia a’oa’oga mo le umi e 12 masina.
O le tausaga faaletupe ua faagasolo ua mae’a ona pasia ai i le fuafuaga tau tupe a le Malo le isi 51 miliona mo le poloketi, lea o le a maua ai e itumalo palota taitasi le tasi le miliona mo le faatupeina o atina’e eseese mo le manuia lautele o tagata o itumalo palota e 51.
