E lua vaiaso ua toe faaauau ai aso malolo poo aso livi faapitoa o le Ofisa Sili o le Pulega o Tagata Tafafao mai Fafo le susuga Faamatuainu Lenatai Su’ifua, a o tālia ai e le Komiti Faafoe a le pulega o tagata tafafao se fautuaga faaletulafono mai le Loia Sili a le Malo, i le taunuuga o a latou su’esu’ega ua mae’a i tuua’iga a se tagata faigaluega faasaga i le Ofisa Sili.

O le lipoti o lea su’esu’ega ua fautuaina ai le faia o se lapata’iga poo se warning mo le faauluuluga o lea auaunaga tāua a le Malo ma o le lapata’iga lea o loo faatalia ai se fautuaga faaletulafono a le Loia Sili pe faapefea ona faataoto ni aiaiga o le lapata’iga.

O loo tālia foi se lipoti a le Matagaluega o Tupe a le Malo e faatatau lava i nisi o tuua’iga sa faasaga i le Ofisa Sili e faasino i nisi o meatotino poo aseta a le pulega o tagata tafafao, ma o lea lipoti ua fautuaina i le lipoti o le sailiiliga e tatau ona tuu faatasi ma le lipoti a le komiti faafoe sa feagai ma le su’esu’ega.

O se tasi o fautuaga i lea lipoti o loo ave ai le tuualalo i le Ofisa Sili ina ia mulimulita’i i ta’iala o amioga tausili i le faatinoga o ona tiute ma ia faaaloalo i tagata faigaluega aemaise o lona tausisia o tulafono a le Malo o loo fai ma fetu pupula e ta’iala ai le pulea o galuega. O le masina fou o Iuni e mae’a ai le 3 tausaga o le konekarate a le Ofisa Sili o pulega o tagata tafafao mai fafo.