Ua ave faamalosia e nisi o le vaega e faaigoa o separatist fighters i Indonesia se pailate mai Niu Sila e pei ona lipotia e le leitio faasalalau a Niu Sila.

O faamatalaga na tuuina mai e se kulupu o loo finau mo le tutoatasi o le faaitu lea o le atunuu ua o latou faailoa ai o le vaalele laititi na tulaueleele i le faaitu lea o se nofoaga maotua, ua susunuina i le aso ananafi i le Papua Province.

O se sooupu a leoleo mai le itumalo lea ua ta’ua ai o loo latou suesueina le mataupu ma o loo sailia nei e leoleo le pailate ma le pasese e toalima sa i luga o le vaalele.

Fai mai nisi lipoti o le pailate o Captain Philip Merthens ma e le o mautinoa poo ave faatasi atu ai ma le pasese e toalima.

O le vaalele na faatautaia ana malaga e le Susi Air ma sa taunuu saogalemu i le taeao ananafi ae osofaia ai e le vaega tetee lea e pei ona faamanino mai e leoleo.

Ua ta’ua o le West Papua National Liberation Army lea na faatinoina le osofaiga ma ua faailoa ane e lē faamatuua mai le pailate sei vagana ua tautino ma faailoa e le malo le tutoatasi o le itumalo lea e igoa o West Papua.

Ua faailoa e le Palemia i le Morning Report o loo galulue ai nei le ofisa o Niu Sila i le mataupu lea.