Ua avanoa nei le tele o potu I nofoaga faanofoesea, ma o lea ua fuafua o le a aumai ai tagata faigaluega mo galuega taua, o le au sulufai faapea fanau aoga mai fafo
O le faasilasilaga lea mai le minisita o le Koviti, Chris Hipkins I le avanoa ai o le tele o potu mai le saolotoga o feoaiga a Niu Sila ma Ausetalia lea ua iai nei
E 300 tagata faigaluega faavaitaimi I masina taitasi amata atu I le masina fou, ma maua ai le atoaga e 2400 I le faaiuga o Mati 2022
O le a faaopoopo lea I le 2000 tagata galulue faavaitaimi lea na ua maea ioeina e le malo I le tau vevela faatoa uma atu
O le a mauavanoa ai foi ma le tusa ma le 400 fanau aoga mai fafo I le masina fou aua le amataga o le kuata lua o lenei tausaga, 240 tagata faufale e omai I le va o Iuni ma Oketopa, faapea le tasi selau o tagata sulufai I totonu o le 6 masina amata atu ia Iulai
O lea foi ua maea faafou e le malo nisi o faatagana faapitoa e mafai ai ona agai mai tagata galulue e iai le poto masani faapea faigamalaga taua, omai ma le toe foi atu I le Pasefika ma e tatau ona faatonu muamua mai nofoaga e faamautu ai I nofoaga faanofoesea
Ao talanoa ai la I nei fuainumera faapea le toe teuteu o nisi o tuutuuga I avanoa mo le Pasefika, o lea lava e le I toe maua mai se tala I le tatala o le saolotoga mo faigamalaga I le va o Niu Sila ma le Pasefika, seia vagana ai le Atu Kuki lea o le a amata saoloto I le Aso Gafua o le vaiaso fou.
