O le amata ai mai le vaeluaga o le po o le Aso Gafua, o ananafi lea i Samoa o le 30 aso e faamamalu ai poloa’iga mo faalavelave faafuasei e mafua i le tulaga faaletonu o le auaunaga a le eletise i le motu o Upolu, ua faailoa ai e le ta’ita’i o le Malo le afioga i le tamaitai Palemia, afioga Fiame Naomi Mataafa, o se avanoa tāua lea e tuuina atu ai le fesoasoani i aiga ma pisinisi ua aafia meatotino ona o le motusia o le eletise.
O se poloa’iga foi o le a vave faatino ai galuega faaleleia o le eletise e pei o le faaolaina o afi lisi faavaitaimi lea e taunuu i le faai’uga o le vaiaso nei.
Ua faia le faai’uga e faatino le poloa’iga o faalavelave faafuase’i e tali atu ai i le tulaga ma’ale’ale ua iai le tau faasoasoaina o le eletise ma ua aafia ai tagata lautele ma le saogalemu o fale ma meatoino tau eletise ua faaleagaina.
O aafiaga o oloa tau taumafa tuu’aisa, aemaise o le ono oo atu ai i le 16 pasene aafiaga o le ola ma le tupu o le tamaoaiga o le tatou atunuu ona o faaletonu i le eletise.
I le saunoaga faalauaitele a le ta’ita’i o le Malo sa auai ma sui o le komiti faufautua a le malo mo faalavelave faafuase’i lea e aofia ai ma le Ofisa Sili o le pulega o le faalapotopotoga o le malosi tau eletise.
Na fesiligia ai le Ofisa Sili e tusitala i le itu i tapenaga alualu mamao ma le tula’i mai o le faaletonu e lē gata o sooga o uaea eletise malolosi i lalo o le eleele, ae o aafiaga o nisi o afi o loo maua ai le eletise.
Le Ofisa Sili o le Faalapotopotoga o le malosi faaeletise, afioga Faumui Iese Toimoana.
O le poloa’iga o faalavelave faafuase’i mo le motu atoa o Upolu mo le 30 aso, e mae’a i le vaeluaga o le po o le aso 29 o Aperila.
Ua amata faamamalu poloa’iga ina ua mae’a sainia e le afioga i le Ao o le Malo le afioga Tuimalealiifano Vaaletoa Sualauvi II.
