E le’i leva atu nai aso na mua’i maitauina ai le vairusi feavea’i e namu, le Japanese encephalitis i Vitoria, ae o lea ua faailoa i lipoti i le asō ua faamauina le oo ane o le vairusi i Cowra i le itu i Sisifo o le setete o Niu Sa Uelese. Faamaonia ane e le NSW Health i le 9News na maua le vairusi lea i se su’esu’ega na faia i le aso 20 o Novema ma o le itu e faapopoleina ai ona o lea faato’ā amatamata le tau vevela ae ua amata faamauina le maua o lea vairusi.
O le tau vevela e atili ona faateteleina ai le namu e pei lava ona silafia ma ua faailoa e le sui o le NSW Health e fia faamanatu i le lautele e tatau ona malupuipuia i latou mai le namu ona e ono aafia ai i le faama’i lea o le Japanese encephalitis ma le Murray Valley encephalitis ma isi vairusi e tali faapea foi.
Ua oo atu nei la i le 60 faaitu i Niu Sa Uelese ua faamauina o loo maualuga ai lamatiaga o le ono aafia i le Japanese encephalitis ma o loo iai le tuipuipui e mafai ona puipuia mai ai mai lea vairusi ua iai soifua ua ma’umau ai.
Puna o Faamatalaga: https://www.9news.com.au/national/kunjin-virus-mosquito-borne-disease-detected-in-nsw/6059fba1-fd06-4b0d-82af-f218447c9a2c
