O se talavou mai Ausetalia lea ua molia i ni moliaga ina ua feta’ua’ina lona faia o ni telefoni taufaasese aga’i i pisinisi ma auaunaga tau a’oa’oga i Amerika ma faailoa iai le iai o ni faalavelave ua to’atele ni tagata ua maliliu ai i a’oga i Amerika.
Ta’ua e le 9News i le asō, o faamatalaga mai leoleo Ausetalia ua ta’ua ai na o latou maua faamatalaga mai le FBI o loo iai se tagata mai Ausetalia o se sui o se online crime network poo ni sootaga i luga o upega tafa’ilagi latou te faatupu ni faalavelave, o loo faasagatau ai ia Amerika.
Latou te faia ni telefoni taufaasese i auaunaga o faalavelave tutupu faafuase’i ma faaosofia ai le tali ane o auaunaga ia ae e lē moni faalavelave o loo lipoti ane.
Fai mai la leoleo Ausetalia o lea talavou e mai Niu Sa Uelese ma sa faia se sa’iliga i lona fale ma ave ai e leoleo ni masini ma se fana e lē faatulafonoina.
E 12 ona moliaga ua faia ma o le faasalaga o tulaga faapea e ono oo atu i le lima tausaga i le falepuipui pe a faamaonia, ae o isi moliaga tau ‘au’upega e ono oo lava i le 14 tausaga i le falepuipui.
O le asō o loo faatulaga e tula’i ai i le faamasinoga o tamaiti i Niu Sa Uelese.
Puna o Faamatalaga: https://www.9news.com.au/national/nsw-teenager-charged-hoax-calls-mass-shootings-usa/185bc9cc-53ca-4088-9afc-0619904f38c
