O le Pacific Officers Law Enforcement Network poo le POLEN e faapuupuu ai, o se totino i totonu o le auaunaga o leoleo i Niu Sa Uelese ma o loo faauluulu i se tasi o alo o Samoa, le afioga Tuala Tamalelagi Benjamin Sega.
O loo aofia ai ma malu o le malo ma nisi e tautua i auaunaga faaleoleo i nIu Sa Uelese ae iai tupuaga Pasefika.
O lenei totino na amata faatuina i le 2022 i lalo o le ta’itaiga a Tuala ma nisi latou te galulue faatasi i le Matagaluega o Leoleo ma e lei mamao atu nei sa tauaaoina ai se tasi o faailoga taualoa le Irene Juerges Award mo Tuala e faamaufaailogaina ai le taua o lana tautua i komiuniti o le Pasefika i NIu Sa Uelese.
E tele matāfaioi o loo feagai ma le POLEN ma e galulue faatasi ai ma isi faalapotopotoga i le komiuniti aua se fesoasoani mo tagata Pasefika e le gata i le tulafono ma soligatulafono, ae tulai foi mo se leo o alii ma tama’ita’i Pasefika o loo iai i le auaunaga faaleoleo i totonu o Ausetalia aemaise i Niu Sa Uelese.
Saunoa Tuala i se faatalanoaga ma talafou, e taua tele foi le faatinoina o le latou galuega ma tuu iai le faaaloalo ma tulaga faaleaganuu a le Pasefika e fesoasoani tele foi i o latou faiva.
O Tuala Tamalelagi Ben Sega e mai afioaga o Fasitoo tai, Safaatoa Lefaga, Manono, Saanapu ma Vaitoomuli i Savaii. O loo avea nei ma ta’ita’ifono o le POLEN ma o se alii satinio se leoleo su’esu’e faapitoa, Detective Sergeant i le NSW Police Force.
Puna o Faamatalaga: https://www.facebook.com/PolenNSWPOLICE
