Ua atoa tofiga o le laulau o le pulega o le Ekalesia Aoao EFKS e faatino ai taualumaga o lana fonotele o lenei tausaga 2023, ina ua filifilia se tasi o faifeau toeaina e avea ma sui taitaifono e sui tulaga i le faifeau toeaina faatonu sa tauaveina le tofiga le susuga Iosefa Atapana Uilelea na tuumalo ia Tesema o le tausaga na tea nei.
O Iosefa na filifilia e avea ma sui taitaifono i le mae’a o le fonotele o le tausaga ua mavae lea na faia i le masina o Setema.
O le sailia o se sui taitaifono na faatino i le aso muamua o le fonotele o lenei tausaga lea ua filifilia ai le faifeau toeaina susuga Auatama Esera o loo galulue ma le faletua ia Tamara i le aulotu EFKS i Sapapalii Savaii i le pulega a Safotulafai.
O le tofiga sui taitaifono e tusa o aga masani a le ekalesia faapotopotoga kerisiano Samoa e faatoa filifili i le palota i le aso mulimuli o le tauaofiaga a le fonotele, peitai ona ua avanoa le tofiga o le mafuaaga lea na faia ai le filifiliga ina ia faamalieina faiga faavae a le ekalesia pe a usuia ana fono tele faaletausaga i tofiga o le laulau e taitaia galuega uma o le faagasologa o le fono.
O le sui taitaifono e see i le tofiga taitaifono pe a mae’a le paeaiga lenei a o lumanai le isi fonotele.
O lona uiga e toe filifilia se isi sui taitaifono mo le tofi taitaifono faaolioli o le tausaga asau.
O le susuga i le toeaina Tunumoso Iosia e maea lona tofiga i le Aso Faraile nei pe a mae’a le fonotele o lenei tausaga.
