O le Aso Lulu o le vaiaso nei aso 18 o Me na atoa ai le tausaga talu ona aumai le faaiuga a le faamasinoga sili a le atunuu, na faalēaogā ai le faasilasilaga a le Ao o le Malo na poloaina ai le toe faia o se isi faigapalota tele faavavevave a le atunuu, ina ua tuanai lana palota tele o le aso 9 o Aperila o le tausaga na te’a nei 2021.

O lea faaiuga na faailoa ai e le faamasinoga le solitulafono o le toe faia o se isi palota e filifilia ai sui usufono o le paea’iga lona 17 a le Palemene ona o loo tumau pea le aloaia o le faaiuga o le palota na faia ia Aperila. Na mafua le faaiuga ina ua lui e le vaega faaupufai o le Faatuatua i le Atua Samoa ua Tasi le faasilasilaga a le Ao o le Malo, na mafua ona o le faaiuga o le palota tele na manumalo ai le vaega faaupufai o le Faatuatua i le Atua Samoa ua Tasi i nofoa e 26 ae umia e le vaega e puipuia aiātatau a tagata nofoa e 25 o le aofaiga e 51 o nofoa o le Palemene.

Ae na toe faasilasila e le Ao o le Malo le isi palota ina ua tutusa i le ta’i 26 nofoa o vaega faaupufai e lua ina ua faailoa e le Komesina o faigapalota ma faamaonia e le Ao o le Malo le nofoa faaopoopo o sui faipule tamaitai ua maua e le vaega e puipuia aiātatau a tagata. O le talitonuga sa iai na atoa nofoa e lima o tamaitai i le faaiuga o le palota tele ae e pei ona silafia o lea mataupu na oo i foga a le Malo ma aumai ai le faaiuga a le faamasinoga maualuga o le 10 pasene o nofoa e lima sefulutasi o le to’aono o sui faipule tamaitai.

Na toe lui e le vaega e puipuia aiātatau a tagata lea faaiuga ma aumai ai le iuga a le faamasinoga o talosaga apili a le faamasinoga sili, ua ono nofoa o tamaitai i le aiaiga e 10 pasene.