O le faaiuga o le vaiaso lenei e atoa iai le tausaga o le paeaiga lona 17 ua iai nei a le Palemene i le tuanai ai o le Aso 9 o Aperila o le tausaga na te’a nei na faia ai palota tele a le atunuu.

O le taulalata ai ina atoa le 12 masina muamua o le paeaiga 5 tausaga a le nofoaiga ua iai nei ua maea ai ma le 12 masina muamua o le lua tausaga o loo aiaia i le fuaiupu 101 o levaega 13 o le tulafono o faigapalota e avanoa ai ona faia momoli poo o’o a sui faipule i o latou itumalo.

O lona uiga e lua tausaga o loo aiaia e tatau ai ona faatino lea faaaloalo e tusa ai ma tu ma aganuu e se sui faipule ma a maea loa lea taimi faatulagaina e lē mafai ona toe faatino ni momoli ma o’o.
O loo aiaia foi i lea vaega o le tulafono o faigapalota e le’o se solitulafono i se faiga faaalatua le faatinoina o lea faaaloalo pe a faatino o totonu o le lua tausaga ina ua tuanai le faalauiloaina ai o le iuga o se faigapalota ma filifilia ai se sui usufono a le Palemene.

O nisi o tagi o palota ua mavae o tasi lea o moliaga na ave e nisi o sui tauva o le o’o ua faatino ae ua tapu le faatosina o taumafa ma Tupe ma e iai nisi o moliaga na faamaonia ma toe faaleaoga ai le filifilia o le sui na manumalo.

E le’o faamalosia i aiaiga o le tulafono o palota le faia o momoli ma o’o ae ua aiaia faaletulafono le taimi e tatau ona faia ai ma ua tuu mamao ese ma le taimi ua lata i se faiga filifiliga a le atunuu.