O le amataga ole vaiaso nei na taunuu ai i fanua le Faatonu ole Ofisa o Polokalame ma Atinae a Malo Aufaatasi le United Nations Development Programme (U.N.D.P) ia Kanni Wignaraja ma oloo talimalo ai le ofisa i Samoa nei.
E pei ona faailoa ai e le U.N.D.P i upega tafailagi, na faafeiloai i se ava o feiloaiga na faatinoina e le aufaigaluega galulue ile ofisa tutotonu a Malo Aufaatasi i Tuanaimato.
O nisi o vaega e pei ona faasalalauina ile Facebook Page ale ofisa e aofia ai le asiasiga i le maketi o fefaatauaiga i Fugalei ma feiloai ai i nisi o tina faipisinisi e pei ona iai se tasi o poloketi oloo fesoasoani ai le U.N.D.P ma le U.N Women ua faaigoaina ole Markets for Change lea e unaia ai tina ma tamaitai ina ia mafai ona maua le tomai ma agavaa e atinae ai a latou pisinisi laiti.
O le faalauiloa lea o auaunaga ma galuega tauave a le ofisa a Malo Aufaatasi ma faatino ai lana fonotaga muamua ma le aufaigaluega talanoaina ai vaega oloo fitoitonu ma le auaunaga a le U.N.D.P i Samoa nei.
O le taeao nei na faimalaga atu ai i Manono Wignaraja ma sui ole U.N.D.P e asia atinae ma poloketi oloo ave ai le fesoasoani.
