O le malaga asiasi mai a le failautusi aoao a Malo o Taupulega, Hon Patricia Scotland KC na ia asia ai nisi o nofoaga ua fuafua e faaaogā i le fonotaga tele a taitai o Malo o le Taupulega.

Ma o ia nofoaga e aofia ai le Palemene, Maota o Tupulaga Talavou a le E.F.K.S. i Sogi, Ofisa Faafailautusi a le Fono Aoao Faitulafono a Samoa, o Fale Taalo i Tuanaimato, o nisi o Faletalimalo e aofia ai le Lava, Sheraton ma isi.

Na feiloai le aumalaga ma le afioga i le Palemia ia Fiame Naomi Mata’afa e saga faamautūina tapenaga a Samoa mo lea faamoemoe tele. 

Na auai foi le tamaitai failautusi aoao i le fonotaga a le Komiti Faafoe o tapenaga mo le fonotaga ma faaali ai foi sona finagalo e tusa ai tapenaga a Samoa.

Na maua foi le avanoa e faasoa ai le finagalo o le tamaitai aemaise o vaega moomia ina ia mautinoa le lava tapena o Samoa mo i latou o le a malaga mai mo le faamoemoe e aofia ai apitaga, auala o femalagaa’iga, puipuiga o le saogalemu, femalagaa’iga faavaomalo – immigration, faasalalauga ma lipoti tusitusia, fesootaiga televavave faaneionapo, taumafataga, soifua maloloina ma isi. 

Lipotia e le Savali sa maua foi le avanoa e feiloai ai le Failautusi Aoao ma le afioga i le Taitai o le Itu Agai, Tuilaepa Sailele Malielegaoi. 

Na faaalia le agaga fiafia o le aumalaga, ona o loo to’a pea ma sologa lelei tapenaga uma a Samoa mo lana taligamalo. 

E faamoemoe e toe malaga mai i le ogatotonu o lenei tausaga, a o lei oo atu iaOketopa e amata usuia ai lenei Fonotaga Tele.

O le faaiuga o le vaiaso nei o le a toe taliu ai le tamaitai failautusi.