Photo by MAF

Asia e le Palemia Talomua a le afioaga o Tafua

Ua molimauina pea le lagolago a nuu ma afioaga o itumalo o le suiga fou i le faalauiloaina o fua o faatoaga ma faaeleeleaga mai le susueina o le vao e ala i faatoaga i le Talomua a le afioaga o Tafua i le Aso Tofi o lenei vaiaso.

E le gata sa asia e le Minisita o Faatoaga ma Faigafaiva ae sa auai foi ma le taitai o le Malo le afioga i le Palemia, e saga faamautu ai le tāua o le sao o le aufaifaatoaga i le tamaoaiga, aemaise o le lava ai pea o taumafa mo le atunuu atoa. O se uluai taimi lenei ua faatino ai e le paia o lea afioaga i le motu o Savaii se Talomua, ua silasila ai taitai o le Malo i seleselega o faatoaga mai tuāmaota ma tuālaoa o le nuu.

Na saunoa ai le tamaitai Palemia le afioga Fiame Naomi Mataafa, ma ia faamamafa le taua o le toe ave o le faamamafa a le Malo i le galueaina o faatoaga ma saga faaleleia le itu i faigafaiva auā o le ivitu malosi lea o le atina’e o le atunuu, e pei ona sa sau ai i le tele o tausaga ua mavae.

O le faia o Talomua i totonu o nuu ma afioaga o itumalo e 51 o le avanoa e auai uma ai le aufaifaatoaga ma le aufaifaiva, ma ua le toe mulimulitaia ai le faiga sa iai muamua, o le fai tasi mai i Apia poo Salelologa ae ua na’o ni faifaatoaga e fili e auai. 

Scroll to Top

Keep uptodate with Radio Samoa activity & promotion

* indicates required