Na talimalo Samoa i le asiasiga a le Minisita o le Va i Fafo a le Malo Ausetalia ia Penny Wong ina ua ia asia le atunuu i lenei vaiaso.
O le taimi lona lua lenei ua asia ai e Penny Wong le Pasefika e aofia ai ma Samoa ma na mafai ona feiloai atu i le Ao Mamalu o le Malo afioaga Tuimalealiifano Vaaleto’a Sualauvi II faapea le tamaitai Palemia Fiame Naomi Mata’afa.
O lenei asiasiga na faailoa ai e Penny Wong se faigapaaga fou mo le 8 tausaga i le va o Samoa ma Ausetalia e faailoa ai nisi o atina’e mo tagatanuu poo le Human Development. O lea faapaaga fou ua faaigoaina “Tautua – Human Development for All” o le a tagatagai ai i mataupu tau soifua maloloina, mataupu i aoaoga, o puipuiga ma tulaga ma’ale’ale i totonu o Samoa.
E tele nisi o atina’e o loo fesoasoani ai Ausetalia mo Samoa e pei o le tulaga o le puipuiga lea o le ogasami lea ua lata i le 30 tausaga talu ona amatalia lea faapaaga ma o loo iai le naunautaiga o lea malo e faaauau pea nei galuega fesoasoani i le va o atunuu e lua.
E lua aso o le asiasiga a le Minisita o le Va i Fafo a Ausetalia na asia ai Samoa mai le aso 2 – 3 o Iuni. Na ave ai foi le faamalo a Penny Wong i le malo o Samoa i le faamanatuina ai o lona 60 tausaga talu ona tutoatasi.
