O le faamoemoe o poloketi e pei ona fesoasoani mai ai le Iuni a Europa o le tapueina lea o le suavai mamā ia faaauauina pea auā le faaaogāina e tagata o le atunuu i nofoaga o loo faamautu ai.
E pei ona faailoina e le Matagaluega o le Siosiomaga e ala i se asiasiga a le Vaega o Suavai poo le Water Sanitation and Hygiene Coordination division ma le aumalaga a le Iuni a Europa i nisi o poloketi tau suavai i le atunuu o se molimau ola lea o lenei faamoemoe.
E tolu poloketi na asia e aofia ai le poloketi o loo faamamā ai le suavai i le afioaga o Nuusuatia poo le UV filtration system, o le poloketi i Vailele Intake Treatement and Borehile ma le tane o loo tapue ai le suavai i le Kolisi o Vaimauga.
O le poloketi i Nuusuatia o loo faaaogāina ai masini faaonaponei e mafai ona faamamā ai le suavai mo le fofoga taumafa o le afioaga.
O le treatment plant i Vailele ma na silasila ai le asiasiga le faasoaina o le suavai i le faaaogāina o masini faatekonolosi ina ia mautinoa le kilivaina o le suavai mamā.
O le nofoaga mulimuli na taualuga ai lenei asiasiga o le Kolisi o Vaimauga lea o loo iai tane o loo tapueina ai le suavai mai le timu.
A o faatino ai nei asiasiga na feiloai ai sui o le Iuni a Europa ma sui o afioaga ma nofoaga o loo iai nei poloketi ma faapupula ai le siitia o le suavai mamā o loo faaaogāina ai nei poloketi o se sao tāua tele lea i le faaitiitia ai tulaga e ono aafia ai le soifua maloloina aemaise o se faamāmā avega lea i le sailia ai o se suavai mamā.
O le manulauti lava ina ia faaauauina pea le vaaia faalelei o nei poloketi o loo tele se fesoasoani i tagata o le atunuu e ala i le maua pea o le suavai mamā mo le faaaogāina.
