O se taimi muamua ua masii ai ta’ita’i o le malo o Samoa Tuto’atasi e tali faaaloalo i le valaaulia mai ta’ita’i o le faigāmalo a Amerika Samoa e auai i le tatalaina o le Maota Fono fou o le fono faitulafono a Tutuila ma Manu’a.
O se taimi muamua foi ua toe taliu mai ai lea faigāmalaga sa aofia ai le Ao o le Malo ma lana Masiofo, o le Palemia ma lona faletua, o le Fofoga Fetalai ma se Minisita o le Kapeneta, ua faailoa ai e le Palemia le ta’ita’i o le malo, faaaloaloga ma tupe na maua i faaaloaloga sa faatino e le malo o Amerika Samoa i le aumalaga.
Samoa Tuto’atasi
Ua faailoa ai e le Palemia i le feiloa’iga ma tusitala le faai’uga a le Kapeneta ina ia faia se fuafuaga talafeagai e tusa o faaaloaloga na maua mai le faigāmalaga sa faaaluina ai se tupe a le malo e tusa ma le 250 afe tālā ae ua toe faaola i le matāgaluega o tupe a le malo le 300 afe tālā.
O le i’uga foi a le Kapeneta na faia ai faaaloaloga i afioga i Sui o le Fono a Sui Tofia, o i laua sa avea ma Palemia o le malo e pei o le ta’ita’i o le Itu Agai, ma le ta’ita’i o le pati faaupufai o le Samoa ua Potopoto.
Sa faapea foi ona faia meaalofa tupe sa tuuina atu i le nofoaga o tagata matutua i Logoipulotu ma Mapuifagalele ma le nofoaga o Tama’ita’i Sā Monike e ta’i lima afe tālā, ae sa maua foi e nisi o faalapotopotoga tuma’oti ni meaalofa tupe sa faailoa e le Palemia.
Le afioga i le Palemia susuga Laaulialemalietoa Leuatea Polataivao Fosi Schmidt.
O isi foi faaoloaga o le malaga sa tufatufa ia i latou uma sa malaga e pei o le fā’ili a Malu o le Malo ma ofisa sinia o le malo sa malaga.
