Ua taunuu i laufanua o Ausetalia le aulakapi o le Penina Pasifika a o lumanai ai le la taaloga ma le aulakapi a le Queensland Reds.
I pepa o faamatalaga na faailoa mai ai le toatele o sui o le mamalu o tagata Pasefika faapea ma sui o le Australia Rugby na auai atu i le taunuu ane o lenei ‘au a tamaitai.
Faaalia e sui o le aumalaga a le Penina Pasifika lo latou agaga faafetai i le mamalu o le atunuu ma tagata Pasefika na auai atu i le faatasiga.
O le ‘au o le Penina Pasifika, ua ta’ua o le a fai ma auala e atia’e ai le taaloga o le lakapi i tamaitai, ae o le a faapea ona latou agavaa ai e taaalo i tauvaga ma taaloga lakapi i Ausetalia o loo maitauina o loo faatino i ni tulaga maoa’e ma le maualuluga.
O loo faapea ona lagolagoina e le Malo o Ausetalia le ‘au e tauala mai le polokalame o le PacificAus Sports.
