O le aso 1 o le masina fou o Aperila e tatala ai le tuuina atu o talosaga mo le Samoan Quota ma le Pacific Access Category mo lenei foi tausaga 2026.
O vaega nei e lua mo le mauaina o visa nofomau i Niu Sila ua autausagā o iai pea mo Samoa ma isi atunuu o le Pasefika, lea e faia ai se se’i i suafa o i latou e talosaga atu, ma afai e uma ane le se’i ua manuia ai se tasi, ona faagasolo loa lea o isi mea uma e moomia e tapena ai le mauaina o le visa nofomau.
Mo lenei tausaga, e oo atu i le 1,100 tagatānuu Samoa e mafai ona maua lea avanoa, mo Tonga e 250, o Fiti e 250, o Kilipati e 75, ma Tuvalu e 75.
E mafai foi ona faatino atu i luga o le initaneti lau talosaga, ma o loo iai ta’iala ua saunia i luga o le upega tafa’ilagi a le ofisa e fesoasoani atu ai i le auala e lesitala ai mo lenei se’i.
E maua uma nei ta’iala i gagana uma a atunuu o loo avanoa iai lenei polokalame, mo le Quota a Samoa o loo maua i le gagana Samoa ma le Peretania, faapea foi i gagana a isi atunuu o le Pasefika lea e faatalosaga mo le Pacific Access Category.
O le a tapunia avanoa e tuuina atu ai talosaga mo lenei se’i i le aso 30 o Aperila 2026 i le 5pm i le afiafi taimi a Niu Sila.
