Ua faamatu’u e le malo le 10 eka o ‘ele’ele o le malo i le taulaga o Salelologa i Savai’i e fausia ai le uluai maota gasegase mo auaunaga faapitoa tau soifua mālōlōina a le kamupani o le Pasefika Specialist Healthcare Samoa. A o lea, ua amata tapena le galuega ina ua mae’a le sauniga i le amataga o lenei vaiaso, na suaina ai le ‘ele’ele.

O le lima a’i lea o falemai o lea kamupani mai Fiti e pei ona iai falema’i e fa i lea atunuu. Ua faailoa e le alii pule sili o lea auaunaga tau soifua mālōlōina le afioga Tagaloafaaofonu’u Parvish Kumar e 12 i le 14 masina o le a fausia ai le falema’i ma le faamoemoe o le a togafiti ai gasegase o le fatu ma isi gasegase e lē o mafai ona togafiti i Samoa i le taimi nei.

Advertisement

O le avea ai o le motu o Savai’i ma nofoaga tutotonu o lea auaunaga faafoma’i o le a mafai ona si’i gasegase iai e lē gata o tagata i lo tatou atunuu ae faapea foi gasegase mai isi atunuu o le pasefika.

O le Ta’ita’i o le Malo le afioga i le Palemia na saunoa i le sauniga o le suaina o le ‘ele’ele e amata ai galuega o lea maota gasegase.

O le ulua’i fono lea i Salafai a le Kapeneta a le faigamalo lona lua a le Vaega Faaupufai o le Faatuatua i le Atua Samoa ua Tasi, talu ona toe filifilia e le atunuu e avea ma faigamalo i le tuana’i o le palota tele ia Aukuso o le tausaga ua mavae.