O loo tapena pea itumalo palota e 33 e faamautu a latou komiti o le atiina a’e o itumalo o le tasi le miliona tala, ae o itumalo palota e 18 ua mae’a nei ona faamautu a latou komiti ua ta’ita’ifono ai o latou sui faipule ma o le amataga o lenei vaiaso fou ua taunuu ai ia latou teugatupe i faletupe eseese i le atunuu le tupe faavae e 200 afe tala e tapena ai ofisa e tapuvae tasi iai galuega o le atiina a’e.

O le faiga faavae fou lenei a le faigamalo ua tu i le foe ua faatulaga ai o le tausaga faaletupe fou e amatalia i le masina o Iulai e maua ai le ta’i miliona tala e faatupe ai fuafuaga a itumalo i atina’e tau faatoaga ma faigafaiva ma isi atiina’e mo le manuia o tagata o itumalo palota e 51. 

Se vaega o le saunoaga a le tamaitai Minisita o Tupe le afioga Mulipola Anarosa Ale Molioo i le sauniga na sainia ai feagaiga ma aloaia komiti a itumalo e 18 ua mae’a ma mautu a latou tapenaga. O nisi o itumalo palota o loo iai pea faafitauli o loo feagai ai ma le faamautuina o sui o a latou komiti ona e lē o talia e nisi o ia itumalo le ta’iala ua tuuina atu e le Malo e filifili ai sui o a latou komiti.

O le masina fou o Iuni o loo toe tuu avanoa ai le komiti o le fuafuaga lenei a le Malo mo itumalo e 33 e lei mautu a latou tapenaga e tatau ona oo atu iai ua maua se autasiga mo le faamatuuina iai o le luaselau afe tala o le tupe faavae, a o lumanai ai le amatalia o le ta’i miliona e maua i tausaga ta’itasi o le paeaiga lima tausaga ua faagasolo o le paeaiga lona 17 a le Palemene.