Ua amata i le asō le Polyfest o lenei tausaga.
E tusa ma le 8000 fanau aoga mai kolisi maualuluga o loo faamoemoe e faafiafia i lenei tausaga, ma e manatu le Councillor mai Manukau Ward, Alf Filipaina e tatau ona lagolagoina e tagata lenei faamoemoe.
E 239 ausiva eseese mai aoga e 69 i totonu o Niu Sila o loo auai i le tausaga lenei, ma ua iloa ai foi le tele o aoga ua toe auai e pei ona sa iai i tausaga ua mavae a o lei aafia le atunuu i le Koviti-19.
E ono malae o le a faia ai faafiafiaga, pese, siva faapea tauvaga tautalaga, lea e aofia ai le malae a Maori, Samoa, Tonga, le Atu Kuki, Niue ma le isi o loo tuufaatasi iai isi aganuu.
A o iai le tele o aoga i nei faaaliga, ua fautuaina e le ASB tagata Pasefika ina ia mataala i faiga taufaavalea a le augaoi o loo taumafai e faaaogā le Polyfest e sue ai a latou tupe, e ala i le faatau o pepa ulufale poo tickets ma taumafai e faatau faasalalauga tuusa’o (live link).
E atoa i le tausaga nei le 49 tausaga talu ona faavae mai le Polyfest ma o loo faatino lava i le Manukau Sports Bowl.
