O le taua faasaga i fualaau faasāina e pei ona molimauina le saoasaoa o le ulufale mai i le atunuu o le ‘aisa le methamphetamine, ua lē gata ina faa’au’upega ai leoleo i le su’eina o nofoaga o loo faafailele ai ae o le tausaga fou 2026, o le a amata su’e pe faia ai test a sui Faipule uma o le Palemene, e faapea foi ona faatino ia su’ega i Minisita o le Kapeneta.
O le Aso Lua o lenei vaiaso le feiloa’iga a le Ta’ita’i o le malo ma Minisita o le Kapeneta ma ulu a’oga uma a le malo, o ekalesia ma a’oga tuma’oti.
O lea feiloa’iga o le a faailoa ai e le Palemia le tāua o le galulue faatasi o faia’oga ma le malo i le taofia o le oo atu o fualaau faasāina i totonu o a’oga.
O le feiloa’iga a le Palemia ma tusitala na ia faailoa ai lea feiloa’iga ma le amata o su’ega a faipule i le tagofia o fualaau faasāina i le tausaga fou.
