Ua faamaonia e le Komesina o le Ofisa o le Komisi o Faigapalota o Tuiafelolo John Stanley le toe faatino o lesitala o tagata uma e agavaa e palota, mo le Palota tele i le tausaga e 2026.

O fuafuaga a le ofisa o Komisi o faigapalota o loo ua mae’a faataoto nei ina ua pasia teuteuga o le tulafono o faigapalota.

O le vaiaso nei e amata aloaia ai aoaoga mo le aufaigaluega uma a le Ofisa i le faaaogāina o masini fou e faamauina tamatamailima faapea ai ma le pueina o ata e faatino ai lesitalaga.

E tolu vaiaso o ia aoaoga, ma o loo iai le faamoemoe o le vaiaso lona lua o le masina fou o le a amata agai ai i tua isi o le ofisa e faatino le faamoemoe.

Ta’ua e Tuiafelolo o le toe lesitalaina o tagata o le a toe amata mai lava i le amataga e aofia ai le toe unaia o le tulafono e palota le tagata i le afioaga o loo alala ma pāpāaao ai.

I se pepa o faamatalaga mai i le Komisi o Faigapalota o loo manino mai ai e iai nisi faamaumauga faaopoopo e manaomia mo lea faatinoga, e aofia ai tusifolau, pepafanau faapea ai la ma pepa faamaonia o le matai, faapea ma pepa faamaonia o le fanua o loo nofo ai le tagata pe afai o nonofo i ni fanua umia saoloto.

Na faaalia faalauaitele e Tuiafelolo, ua mae’a foi ona faataoto le polokalame o le faagasologa o le toe lesitara o tagata uma, ma o le amata mai i le Vaimauga ma faasolo atu ai agai Savaii.

Ta’ua e le Komesina o le a faaiu mai lava lea faatinoga i le itumalo o Faleata faasolo mai ai i le talafatai o Apia ona e fai si toatele.

O le autu o lea galuega ma le naunautaiga a le ofisa ina ia mautinoa le lesitalaina o tagatanuu uma ua agavaa e palota ma ia atoatoa lelei le faataatiaga o le lisi o tagata palota mo le faigapaoalota tele i le 2026.

O le faamoemoe o le Ofisa ia oo atu ia Iulai o le tausaga fou ua mae’a le lesitalaga o tagata mo le faigapalota o le 2026.