O le ogatotonu o lenei vaiaso ua tuuina atu finauga faaletulafono i le talosaga a le faipule o Lepa ma le faipule o Faleata 3, ua lu’i ai e le ta’ita’i o le vaega e puipuia aiātatau a tagata ma le failautusi o lea pati faaupufai, le faai’uga a le Palemene ua faamālōlō lē tumau ai o la tiute faafaipule seia iai se aso.
O le Aso Gafua sa faatulaga e faagasolo ai lenei mataupu i le faamasinoga sili ae o nisi o fetuuna’iga i le talosaga a le Loia mai fafo o loo tauaveina le talosaga a le itu tagi ua tuu mai ai i le Aso Lulu o lenei vaiaso. O itu auai o le mataupu lenei ua aofia ai ma le sosaiete a loia i Samoa.
O loo teena e le Fofoga Fetalai o le Palemene le talosaga a Tuilaepa ma Lealailepule i le finauga e lē aiāina e le faamasinoga faai’uga a le Fono Aoao Faitulafono, peitai o loo finau le itu tagi ua afaina o la aiātatau o loo aiaia i le faavae i le faai’uga e faamālōlō lē tumau o la tiute faafaipule seia iai se aso. Ua savalia nei le tolu masina talu ona faamālōlō lē tumau le susuga Tuilaepa L Sailele Malielegaoi ma le tofa Lealailepule Rimoni Aiafi, e aunoa ma le toe maua o ni o la totogi.
O le faai’uga a le faamasinoga sili na faamaonia ai o la moliaga o le faalēmigao i le faamasinoga, na faavae ai se faitioga a le faipule o Gagaemauga Numera Tasi na ave i le Fofoga Fetalai ma filifilia ai sui o le komiti o tulaga mamalu ma aloa’ia a le Palemene, na faia le su’esu’ega ma tuuina atu ai le latou fautuaga e faamālōlō lē tumau sui faipule e to’alua e pei ona talia e le Palemene lea fautuaga.
