E 15 aoga tulagalua i Upolu ua amata ai le galuega o le faia o tui puipui o fanau ona o le faama’i Koviti19 mai le matutua o le 5-11 tausaga.
O le Aso Gafua o lenei vaiaso fou ua amata ai lea galuega seia oo ina faasopolia uma aiga tulagalua i le atunuu. O aoga tulagalua mai Luatuanuu, Laulii, Letogo, Fagaloa, Moataa, Vailele, Samoa Primary, Falefitu, Vaivase, Magiagi, Tanugamanono, Vaiala, Le Aoga Amata a le Faatuatuaga Baha’i Monatesori faapea ma le Devine Mercy School ua amata ai le tūiga mo fanau iti.
Ua lata ina atoa le 90% o le atunuu mai 18 tausaga agai i luga le matutua ua maea tui e lua ae o le 98% o lea matutua ua maea le tui muamua. O lea ua lata i le 8000 tagata ua maea le tui faaopoopo poo le Booster ae o loo faasolo atu lea isi ua atoa le 4 masina talu ona maea le tui lona lua e faatino le tui faaopoopo.
Ua faaalia e le tamaitai Palemia Fiame Naomi Mataafa o le faaletonu lea na tulai mai i se vaega o vailaau o le Pfizer ona o le pusa aisa na teu ai na mafua ona ua motusia le eletise o se faaletonu na faaalia e le Tamaitai Palemia sa lē tatau ona tupu ma ua tuuina atu ai le mataupu mo se suesuega a le Komisi e pulea tagata faigaluega a le Mālō.
Taua e Fiame “Ia tatou manatua o vailaau uma nei o loo aumai i luga o le tulaga faameaalofa mai i Faalapotopotoga ma atunuu eseese, e lē tatau ona tatou faatamala. Atonu e fai ma faataitaiga le tatou vaa lea ua toe ave, o se aseta taugatā, 30 miliona ma tulaga faapena e lē tatau ona faataaloga le faiga o mea nei ma e tatau i le aufaigaluega ona mataalia ma faamautinoa le malu puipuia o nei aseta e agalelei mai ai tatou paaga.”
Taua foi e le Palemia “O le mea lava e faafetaia ai o lea e faitau, e ono telē atu le fainumera o vailaau na ono faatamaia ae o le Pfizer lea na afaina a’o le AstraZeneca e malosi foi lea ma e lē afaina tele pe a faapea e siisii i luga le mafanafana o a tatou pusaaisa. O lea lava la ua malamalama le Kapeneta i le faamalamalamaga a le Matagluega a lea ua matou avea le ripoti i le PSC ona e ao lava ona silasila le PSC e ui o lea ua malamalama i le mea na tupu ae tatau foi i le PSC i lona tulaga o le faalavelave e gafa ma le vaaiga o le aufaigaluega e fai silasila e tusa ai ma le faatinoga o galuega o loo faasino i lea itu o le auaunaga”.
