Ua faailoa e le taitai o le Malo le afioga i le tamaitai Palemia, le afioga Fiame Naomi Mataafa, le faamaonia e le Kapeneta o le amata aloaia o le feagaiga o le a malaga ai o tatou tagata i le nuu paia o Isaraelu e leai ni visa.
O le a faapena foi ona malaga mai tagata Iutaia i lo tatou atunuu e aunoa ma le tapa o ni visa e ulufale mai ai.
Ua faailoa e le Palemia ua leva ona taoto le feagaiga ae o tapenaga i tulaga i Tulafono ina ia manino aiaiga uma o le mafuaaga lea o le tuai ona faatino.
Ae o le malaga saoloto atu o o tatou tagata i lea atunuu mamao o Sasa’e Tutotonu e leai ni visa, na tupu ai se fesili ma tapa ai se finagalo o le taitai o le Malo, pe aisea ua le maua ai sea avanoa faaauro e o tatou tagata e malaga atu ai i Niu Sila poo Ausetalia e sili ona latalata mai, e aunoa ma le tau faia o ni visa, aemaise i malaga mo siiga gasegase, poo faalavelave faaleaiga ma ni tafaoga pupuu.
