Ua amata i le vaiaso nei ona faasavali le galuega o tui puipui mo le faama’i  Koviti-19 i itumalo o le atunuu lea ua talamalae i le galuega lea a le Soifua Maloloina  i Nuu ma Afioaga e pei o Luatuanuu, Laulii, Letogo, Vailele ma faasolo atu ai i Fagalii.  

O nisi o faleaoga tulagalua o ia afioaga ua faaaoga e agai ai fanau mai le 5-11 tausaga le matutua mo tui o le Pfizer ma ua faapea foi ona fai ai ma tui faaopoopo o le Booster ma tui puipui o i latou e le’i atoa tui e lua.  

I totonu o le taulaga ua iai nofoaga ua agai iai le atunuu ma o le a nonofo mai lava ai totonu o taavale ae faatino atu e tausi soifua o latou tui puipui. Faailoa e le Taitaifono o le Komiti o Faalavelave Faafuasei Agafili Shem Leo i le feiloaiga ma Tusitala i le vaiaso nei…  

“E iai le matou taofi e lē fou sa faatino le tatou tūiga tele lava ia Setema o le tausaga na te’a nei ina ua taunuu mai le tatou AstraZeneca, toe faatino le isi a tatou tui ga tele ia Novema o le tausaga na te’a nei, ma le isi tūiga tele foi i le amataga o le tausaga nei lea foi ua fuafua, le atunuu o faafofoga mai i le taumafai atu a le alii fomai nei ma le Matagaluega o le Soifua Maloloina, ua aumai foi le faamaoniga a le Palemia ma le Kapeneta i le aso ananafi i le taumafaiga o le tatou galuega lenei, o le isi tūiga lea o loo taumafai ai i tatou komiti, ta’imua ai le afioga i le alii fomai  lea ua fuafua e amata i le Aso Tofi o le vaiaso nei ma le Aso Faraile ma faasolosolo ai lava ma le faamoemoe a ma’ea, e fia oo le tatou galuega lea i le faasolo atu i le 5 vaiaso mo Upolu nei”  

O falemai faaitumalo uma i le atunuu aemaise lava i Upolu lea ua amata ai e pei o le falemai i Lufilufi, Lalomanu, Poutasi, Saanapu ma Leulumoega ua faaaoga foi mo le tūiga o faagasolo. O le itumalo Faasaleleaga e faamoemoe e amata ai le tūiga i Savaii ma faasolo atu ai seia oo ina faasopolia uma itumalo o Puleono i Salafai.