A o faagasolo ai i lenei vaiaso le koneferenisi a tina poo le Auuso Fealofani a le Ekalesia Metotisi i lona laumua i Fogaa i Faleula, o se tasi o faamoemoe o lea faatasiga o le sauniga e faatāua ai ma amana’ia le tautua lotu ma le soifua galulue o tina matutua o le ekalesia ua aulia le 70 tausaga o le soifua.
O le fono a le auuso fealofani o lenei tausaga e to’a 87 tina matutua ua latou aulia ia tausaga e tele o le soifua sa ave iai le faamalo ma le faafetai ona o lo latou sao e le gata i le atiina a’e o le ola faaleagaga ae o le itu faaletino i le tautuaina o le ekalesia.
O le koneferenisi a le auuso fealofani o le faato’ā tauaofia lea faatasi ma usugafono mai i atunuu i fafo i le tuanai o le 2 tausaga o tapunia tuaoi faavaomalo ma le mafai ai ona malaga mai i Samoa ia latou faatasiga faaletausaga. E mae’a le fonotaga lenei i le faai’uga o lenei vaiaso, ona sosoo ai lea ma le Koneferenisi tele e usuia i le vaiaso fou o muamua.
