O le faauuga a le Iunivesite Aoao a Samoa i le asō o le a faaee ai foi ma le faailoga maualuga o le Fomai o le Tulafono i le afioga i le Tamaitai Palemia, o Fiame Naomi Mata’afa.
I se faasilasilaga faalauaitele a le NUS Broadcast o loo faaalia mai ai, o lea faailoga e amanaia ai e le Iunivesite Aoao o Samoa le sao tāua a le tamaitai Palemia i itu tau aoaoga, faapea lona sao tāua i le Fono Aoao o Tina ma le atinaega o aiga, aemaise lona sao e ala i lana tautua ua leva tausaga o avea se sui tamaitai o le Fono Faitulafono a Samoa.
O le tausaga 2018 na faaee ai le faailoga fomai a le tamaitai Palemia a o avea ma sui Palemia i lena taimi e le Iuniveste o le Pasefika i Saute e amanaia ai ana galuega, i ana auaunaga tau i le siosiomaga, aoaoga, mataupu tau atinae mo tina ma tamaitai, ma upufai elē gata i Samoa ae faapea foi i le va faalemalo.
O le a tauaao le faailoga o le Palemia i le faauuga tele a le Iunivesite Aoao o Samoa i le asō lea o le a faauu ai le silia i le 400 fanau aoga.
