E to’alua ni tamaitai o le tatou atunuu ua amana’ia a la auaunaga e le Tupu o Salesa III, e ala i ni faailoga taualoa ua tauaao iai.
O ia faailoga taualoa na tuuina atu i le ulua’i tamaitai na filifilia e avea ma Loia Sili a le Malo, le afioga Taulapapa Brenda Heather Latu, ma le tamaitai tausi soifua o Alaimoana Moelagi Leilani Jackson.
Na tuuina atu ia faailoga taualoa a o iai i Samoa le Tupu ma lana Masiofo i le la asiasiga taualoa muamua i lo tatou atunuu, faapea ma le fono a ta’ita’i a malo o le Taupulega.
O le afioga Taulapapa Brenda Heather Latu, ua amana’ia lana tautua i le faailoga taualoa o le MBE poo le Member of the order of the Bristish Empire.
O se faailoga na tuuina atu foi e le Aiga Tupu i se tasi o ona tuaa poo lona grandfather le afioga Taulapapa Dr Anesi.
O le tamaitai tausi soifua sinia ia Alaimoana Moelagi Leilani Jackson ua tuuina atu iai le faailoga taualoa e ta’ua o le Member of the Victorian Order poo le MVO.
O lona tuaa tina le tofa Vaasilifiti Moelagi Jackson ua fai i lagi le tuligasi’a e lauiloa i Samoa i pisinisi tau tagata tafafao, ae sa taulamua foi i le sosaiete tuma’oti o le siosiomaga i le motu o Savaii.
