Ua tapena le pulega o le puipuiga a le malo o Niu Sila poo le New Zealand Defence Force e faatino se faaaloalo e faamauina ma amana’ia ai le galuega lavea’i sa faatino e nisi o tagata ma auaunaga a le malo o Samoa e faasaoina ai ola ma soifua o seila ma le auvaa uma o le vaa su’esu’e o le fitafita o le sami a Niu Sila le HMNZS Manawanui.
O le Aso Tofi o lenei vaiaso o le a faatino ai lea faaaloalo maualuga e le ofisa sinia o le puipuiga a Niu Sila, lea o le a faia i le ofisa o le vaaleoleo o le Nafanua i le uafu i Matautu i Apia, ma le nofoaga autū o le pulega o le tineimu ma galuega lavea’i i taimi o faalavelave i Apia.
O le matagaluega o leoleo, falepuipui ma le toe fuata’ina i le vaega o le vaaleoleo o le Nafanua sa feagai ma galuega fesoasoani ina ua logotala i le faaletonu na tupu i le vaa su’esu’e o le Manawanui.
E faapena foi le auaunaga a le pulega o le tineimu ma galuega lavea’i i taimi o faalavelave faafuase’i.
O le aso 7 o Oketopa na tula’i mai ai se faaletonu i le vaa su’esu’e o le fitafita o le sami a Niu Sila i ogasami i Saute o le motu o Upolu lea o loo goto ai, a o faia ai nei galuega mo le aveesea uma o suāuu o loo i luga o le vaa.
