Ua tuuina mai nei se lipoti o le alualu pea i luga o le numera o taimi e taumafai ai tagata e aga’i atu i fale faamasino i Rotorua ma Tauranga ma ni ‘au’upega malolosi, ma fuālaau faasāina.
I lipoti o loo faamanino mai ai i le va o le masina o Oketopa o le tausaga 2024 ma le masina o Setema o le tausaga lenei 2025, na taofia ai e sikulati o fale faamasino nei le tele o nei meatotino faasolitulafono mai le 125 o tagata i Rotorua ma le 46 o tagata i Tauranga.
O nei vaega e aofia ai le fuālaau faasāina o le methamphetamine, cannabis, naifi poo agaese, o laaumalosi poo fana, ma ututau ma mea faigaluega e faaaogā mo le gaosia o fuālaau faasāina (drug paraphernalia).
Ta’ua ua maualuga lea numera i Rotorua pe a faatusatusa atu i tausaga ua mavae, ae ua vaaia le pa’ū o lea numera i Tauranga.
E tusa ai ma le galuega a sikulati i fale faamasino i le atunuu, ua faatupula’ia nei matāupu i le 19% e pei ona māua le oo atu i le 4,955.
O ia matāupu o loo maua mai i le taimi e faatino ai iloiloga a sikulati e faaaogā ai masini faaneionapo, (metal detectors, X-ray machines) faapea ai le su’esu’eina o le tagata (pat-down searches) pe a moomia ona fai.
Puna o Faamatalaga: https://www.nzherald.co.nz/nz/rotorua-and-tauranga-courts-more-people-try-to-take-in-drugs-and-weapons/GVFGFVKRVREMPHUITRGNYBWT54/
