Ina ua mae’a taualumaga ma felafolafoaiga a le Fono Aoao Faitulafono i luga o le Lipoti a le Komiti o Tulafono Tumau, Mataupu Tau Faiga Palota, Talosaga ma Tofiga Faale-Faavae, i Teuteuga o Tulafono Tumau 2022, na faamaonia ai loa e le Fono Aoao fautuaga ma iugafono a le Komiti.
O se tasi o na fautuaga ma ua faamamaluina ai i le fono i le asō, ina ia aloaia le avea o le Tofa Laufo Fonotoe Nuafesili Pierre Lauofo, o le Taitai o le Itu agai.
O le tofa ia Lauofo lea sa avea ma Sui Taitai o le Itu agai, ina ua tulai mai le vaega faaupufai a le HRPP i le itu o le vaega e agaia le faigamalo, a o avea ai le susuga Tuilaepa Lupesoliai Sailele Malielegaoi ma Taitai o le Itu Agai.
E pei o na silafia o le taimi nei o loo faamalolo ese mai le Palemene le Susuga Tuilaepa faapea le Tofa Lealailepule Rimoni Aiafi mo le umi e 24 masina pe 2 tausaga, ma o lea sa tauave mai ai e le Tofa Lauofo le latou vaega i le tulaga o le Sui Taitai i taimi uma o fonotaga a le Palemene.
Peitai la o lea ua suia nei, ma o tiute uma ma aiā sa tauave e Tuilaepa i le avea ma taitai, o lea ua aloaia nei le faaee atu i le Tofa Lauofo pe a fono le Palemene i totonu o le Maota Fono i Tiafau; e le aofia ai fua a latou faatulagaga o se vaega faaupufai i tua atu ma le li’o o le Palemene pe a fonoa.
