E valu pine auro, tasi le siliva ma le pine apamemea e tasi na manumalo ai le ausiisii u’amea mamafa a le atunuu sa tausinio i Fiti i le vaiaso na te’a nei.
O le taunuuga lea ua tulaga muamua ai Samoa i pine auro na latou maua i lea tausinioga faavaomalo, ae tulaga lua ai le atunuu o Initia.
Ua faailoa e le faia’oga o le ‘au na masii a Samoa i lea tausinioga le afioga Tuaopepe Jerry Wallwork, o le ausiisii na malaga ua agavaa uma pe qualify e tausinio i taaloga a Malo o le Taupulega e faia i Sikotilani i le tausaga fou 2026.
Le faia’oga o le ausiisii u’amea mamafa a Samoa na masii i taaloga na faia i Fiti i le vaiaso ua mavae, afioga Tuaopepe Jerry Wallwork.
O se tasi o vaega tāua ua ave ai le tuualalo a le ausiisii u’amea mamafa a le atunuu i le Malo, silasila ane ia aofia i le polokalame o taui tupe mo tagata taaalo a le atunuu e manumalo i le pine auro i taaloga faavaomalo e aofia ai taaloga a le Pasefika ma le Olimipeka, tagata e manumalo i pine auro i taaloga saili avanoa mo taaloga a Malo o le Taupulega e pei o taaloga sa tausinio ai i Fiti.
