Search
Toomata Norah Leota
Toomata Norah Leota

Agavaa pea Toomata e tauva i nisi faigapalota i le lumanai

O le sui tuava o le Faatuatua i le Atua Samoa ua Tasi mo Anoamaa No.2 le afioga ia Toomata Norah Leota lea ua lē manuia lana tagi na faia faasaga ia Fonotoe Nuafesili Pierre Lauofo Meredith peitai o loo agavaa pea o ia i lalo o le vaega o le faavae e saili ai se tamaitai lona 6 o le palemene.

O lea faamasinoga na faia i le Aso 21 o Iulai 2021 lea ua faatumauina ai le nofoa o le sui taitai o le vaega faaupufai a le HRRP le afioga ia Fonotoe ina ua faamaonia le moliaga e tasi faasaga ia Toomata e faapea o le faalauiloa poo le Roadshow a le FAST na faia i le masina o Mati i le afioaga o Solosolo e solitulafono.

O nisi uma tuuaiga na tuuaia ai Toomata e pei o le totogi o tupe ma le faatinoga na faaleaogaina e le faamasinoga. E 5 tuuaiga o le totogi tupe ma le faatinoga faasaga ia Fonotoe lea foi na faaleaoga uma e le faamasingoa maualuga i le Aso Lulu.

O lenei foi faamasinoga na iai ni molimau na aveese faamalosi mai i nai vaiaso ua tuanai ma e oo mai le tiami nei e le’i maua lava ia molimau.

Taua e Toomata “O se tasi o mea o i nei lava i le ofisa o faamasinoga e ao lava ona mautū ma puipuia malu molimau faapea se potu ma ni auaunaga e taitaina ai ma saogalemu ai le au molimau ae le’i gasolo mai e fai o latou faamatalaga. Ae le gata i lea o ē e taofiofia le amiotonu ma taumafai e fa’asese ma faamata’u tagata, pau lava lea o se manatu o le saolotoga o se mea e sili ona taua.”

O le faamalamalamaga e le Loia a Toomata le afioga ia Alex Su’a o le iuga o le faamasinoga e le’o iai se aafiaga o le tauva ai o Toomata i faigapalota i le lumanai ma o loo iai le avanoa e auai ai Toomata i le sailia o se tamaitai lona 6 mo le Palemene pe afai e leai se tamaitai e tulai mai i nisi faigapalota laiti poo by-elections.

Tala sili ona faitaulia

SAMOA UPDATE

TALA FOU MAI SAMOA

Keep uptodate with Radio Samoa activity & promotion

* indicates required