Agai Samoa i le laasaga muamua (Alert level 1)

Ua faamaonia mai e le Taitai o le atunuu le afioga i le tamaitai Palemia Fiame Naomi Mataafa le laasaga fou o le a agai iai le atunuu.

E pei ona silafia o le to’a 31 lea na aafia i auga o le koviti o loo iai pea i nofoaga faanofoesea ua faamauina mai e to’a 4 ua manuia ma o le toatele ua faasolo ina vaivai le siama. E le’i toe iai nisi ua faaopoopo i le numera o i latou ua aafia ma e leo iai se faailoga ua pepesi i tua le faama’i i le atunuu. Taua e Fiame e tusa ai ma le iloiloga o taumafaiga uma a le malo talu mai lea mataupu ua faaiugafonoina ai e le kapeneta lea suiga mo le atunuu

“E afua atu i le 6:00pm i le afiafi nei 11 o Fepuari 2022 o le a toe foi ai le atunuu i le laasaga 1 poo le lanu samasama”.

Taua foi e le Palemia e tumau pea poloaiga o vavao mo le laasaga 1 ina ia faaauau le mataituina ma le malu puipuia o si o taotu atunuu mai le Koviti 19.

O nei laasaga e aofia ai

Taofia o faigamalaga faavaomalo, vaalele ma vaa la’u pasese sei vaganā ua faatagaina e le kapeneta.
Tausisia o poloaiga faalesoifua maloloina i taimi uma, Fufulu mama lima, faaaoga tali fofoga pe a gasegase, tu ma le nofo vāvā i nofoaga faitele.
Ua tatala potopotoga i nofoaga faitele ae mataitū pea puipuiga lautele mo le faama’i.
Ua tatala le feoai o tamaiti i lalo ifo o le 12 tausaga i nofoaga faitele.
O le a tatala aoga uma ma taaloga i aiaiga ua uma ona faatulaga i le laasaga muamua (1)
Ua tatala femalagaiga i le sami ma le laueleele i taimi ua faatualgaina masani i aso uma o le vaiaso e aofia ai ma le Aso Sa.
Ua tatala taelega i le sami ma vaitafe i aso uma o le vaiaso seia vagana le Aso Sa faatoa faataga i le 12 i le aoauli
Ua tatala fale ava ma falekalapu mai le Aso Gafua i le Aso toanai i le 6 i le taeao e tau i le 12 ile po
Ua tatala le faatauina o le ava malosi i nofoaga ma faleoloa faatulafonoina mai le 6 i le taeao i le 12 i le po o le Aso Gafua i le Aso Toanai.
O loo faasā taaloga faitupe sei vagana ai le bingo mai le Aso Gafua i le Aso Toanai i le 6 i le taeao agai i le 11 i le po. O Casino mai le Aso Gafua i le Aso Toanai i taimi ua faatulagaina i le laasaga muamua
Ua tatala faleaiga mo taumafataga ma le aveina o taumafa (take away) mai le 6 i le taeao i le 12 i le po mai le Aso Gafua i le Aso Toanai
Ua tatala faleoloa mo maketi, o supamaketi ma isi uma maketi o agai iai le atunuu mai le 6 i le taeao seia oo atu i le 10 i le po mai le Aso Gafua i le Aso Toanai
Ua tatala falei’a ma le maketi o fua o faaeleeleaga mai le 6 i le taeao i le 8 i le po mai le Aso Gafua i le Aso Toanai.

Mo le Aso Sa, o nisi nei o aiaiga e ao ona nofouta ai le atunuu

Maketi i’a ma Fugalei o le a tatala i le 9 i le taeao
O supamaketi ma faleoloa laiti, o pamu penisini ma faletalavai (private) e tatala i le 12 i le aoauli i le 10 i le po
O le a faataga tagata lautele ona taumafa i faletalimalo i Aso Sa mai le 12 i le aoauli i le 10 i le po
E tatala faleaiga mo taumafataga mai le 12 i le aoauli
Ua tatala le faatauina savali o oloa i le taulaga ma magāala ae faasā mo tamaiti e i lalo ifo o le 16 tausaga le matutua
Ua tatala auaunaga o falemai mo na’o i latou lava e gasegase. E to’atasi le tagata tausi ma’i i le gasegase ma e na’o le toalua e mafai ona asiasi i se gasegase i soo se taimi

O le vaiaso nei foi na tatala ai i tua le to’a 139 o le aufaigaluega na muaau i le tuanuu atu o le vaalele mai Brisbane Ausetalia ma o loo manuia uma latou i le maea ai ona fai o siaki ma suega.