E lē o toe mamao uu e le Immigration a Niu Sila le malosiaga e na te faasalaina ai pulega o falefaigaluega lea e aumaia tagata galulue mai fafo ma faafaigaluega i ni auala lē alofa.
O le Aso Tofi o le vaiaso o i luma, aso 11 o Aperila o le a amata agavaa ai le vaega o femalagaa’iga i le pule e mafai ai ona tuuina atu pepa o faasalaga i falefaigaluega nei ma faasala.
O ni faasalaga e mafua pe a lē amanaiaina aiaiga o visa o tagata faigaluega, faafaigaluega i ni auala faasolitulafono po ua lē faamalieina foi le 10 aso e faatalosaga ai faamaumauga.
I se pepa o faamatalaga o le soli o vaega nei e tolu, e faasala ai lava i le taimi lava lea ma o le eseesega lea ma le tulafono o loo iai nei e uia muamua le faamasinoga.
O faasalaga e ono aofia ai le totogi o le faasalaga tupe e gata lona maualalo i le $1,000, lē toe ta’ua o se accredited employer poo se Recognised Seasonal Employer poo le faamalolo lē tumau foi.
O nisi soligatulafono matuia e ono oo atu i isi faasalaga e sili atu.
Ua faamaonia mai foi e le vaega o femalagaa’iga o igoa uma o falefaigaluega e faasala e le pulega, o le a maua uma foi i luga o la latou upega tafailagi.
