O le vaiaso nei o loo talimalo ai le Palemene o Tasemania poo Tasmania i Ausetalia i le uluai malaga a le afioga i le Fofoga Fetalai o le Palemene Samoa le susuga Papalii Li’o Oloipola Ta’eu Masipa’u, ma lana aumalaga o ni sui faipule o le tatou Fono Aoao Faitulafono, ma ni ofisa sinia o le ofisa o le Fono.

Ua faailoa i se pepa o faasalalauga mai le ofisa o le fono aoao faitulafono a Samoa, o se polokalame faapalemene o loo auai le Fofoga Fetalai ma lana aumalaga i se polokalame na faavaeina i se faiga faapa’aga ma le Palemene o le Malo o Ausetalia ma le Pasefika.

Ua atoa i le tausaga nei le 15 tausaga o lea faiga paaga ma o le auai atu o le fofoga o le fono, ma nisi o faipule o le a latou molimauina ai taualumaga o le Palemene o Tasemania i le taimi o fesili ma tali ma felafoalfaoaiga i mataupufaapitoa tau sui usufono.

E aofia i le polokalame ni avanoa mo ni faatalanoaga ma feutagaiga ma le Peresetene o le Maota Maualuga ma le Fofoga Fetalai o le fono faitulafono i lea vaega o Ausetalia. 

O le a maua foi le avanoa e feiloai ai le Afioga i le Fofoga Fetalai ma le Aumalaga i le Iunivesite o Tasemania i le Pulega o Faatufugaga Tau Loia, e faamautuina ai feutagaiga mo le faaauauina o le Mataupu Tau Tulafono, Faiga ma Taualumaga Faa-Palemene mo le Aufaigaluega a le Ofisa o le Failautusi o le Fono Aoao Faitulafono.

O le Afioga i le Fofoga Fetalai, Susuga Hon. PAPALII Li’o Oloipola Ta’eu Masipa’u, o loo taitaia le faigamalaga ma o loo aofia ai le afioga i le faipule o Anoamaa Numera Tasi afioga Alai’asa Moefaauouo Malagaitutogiai Sepulona Moananu, ma le faipule o Gagaemauga Numera 2 le afioga i le Minisita lagolago o le Matagaluega o Tina ma Tamaitai Atinae o Afioaga ma Aga Fesootai le tofa Seuamuli Fasi Toma.