O le kamupani o le Sunshine Pacific i Samoa o loo faafoe ai atina’e tau faato’aga ma lafumanu e pei o moa e fasi ma faaaogā i mea taumafa, ae faapea foi fuamoa.

O se isi lea o taumafaiga a le faipisinisi lauiloa i Samoa o Frankies o loo faagaioi i vaega eseese o le atunuu ana faleoloa tetele supamaketi.

O le kamupani a lea faipisinisi i lo tatou atunuu le Sunshine Pacific ua aofia nei i se fesoasoani o loo una’ia ai le faaaogāina o malosi faafouina poo renewable energy i le atina’e o faatoaga ma lafumanu.

O lea kamupani o loo latou faagaioia se atina’e tau faato’aga e ta’ua o le hydroponic farm ma ni lafumoa e maua ai fuamoa ma aano o moa mo mea taumafa.

O le a latou maua se fesoasoani tupe o se grant e faagaioia ai ana atina’e tau faato’aga ma lafumanu ma o ni seleni o le a faasafua foi i atina’e faapea i isi atunuu e lima o le Pasefika.

Faaalia e i le va o le 53 afe ma le 900 afe pauni tupe Peletania o le a maua e pisinisi ua lautogia i atunuu e pei o Samoa, Fiti, Papua Niu Kini, Solomona, Tonga ma Vanuatu.

Sa faalauiloa lea polokalame fesoasoani e se sui o le Malo o Peletania, o le Minisita lea o le va i fafo o lea atunuu i le taimi o loo usuia le fono a Malo o le Taupulega i lo tatou atunuu i le masina na te’a nei.